Kitaab-e-Awwal

"𝙽𝚊 𝚖𝚞𝚍𝚊𝚒, 𝚗𝚊 𝚂𝚑𝚊𝚑𝚊𝚍𝚊𝚝, 𝙷𝚒𝚜𝚊𝚊𝚋 𝙿𝚊𝚊𝚔 𝙷𝚞𝚊"

∘❀∘

CHAPTER - 01

حمارا صعدی - Hamara saadi -

______________________________

𝑨𝒖𝒓 𝒌𝒉𝒖𝒅𝒂 𝒏𝒆 𝒊𝒏'𝒂𝒂𝒎 𝒌𝒊𝒚𝒂 𝑵𝒖𝒉 𝒂𝒍𝒆𝒉𝒊𝒔𝒂𝒍𝒂𝒎 𝒑𝒂𝒓 𝑨𝒖𝒓 𝒖𝒏 𝒌𝒆 𝒃𝒆𝒕𝒐 𝒑𝒂𝒓 𝑨𝒖𝒓 𝒖𝒏 𝒔𝒆 𝒇𝒂𝒓𝒎𝒂𝒚𝒂 𝑨𝒃𝒂𝒂𝒅 𝒓𝒂𝒉𝒐 𝒂𝒖𝒓 𝒑𝒉𝒂𝒊𝒍𝒕𝒆 𝒋𝒂𝒐 𝑨𝒖𝒓 𝒛𝒂𝒎𝒆𝒆𝒏 𝒌𝒐 𝒃𝒉𝒂𝒓 𝒅𝒐 𝑻𝒖𝒎𝒂𝒉𝒂𝒓𝒂 𝒌𝒉𝒐𝒖𝒇, 𝒂𝒖𝒓 𝒕𝒖𝒎𝒉𝒂𝒓𝒊 𝒉𝒂𝒊𝒃𝒂𝒕 𝒉𝒐𝒈𝒊 𝒛𝒂𝒎𝒆𝒆𝒏 𝒌𝒆 𝒉𝒂𝒓 𝒅𝒂𝒓𝒊𝒏𝒅𝒆 𝒑𝒂𝒓 𝑨𝒂𝒔𝒎𝒂𝒂𝒏 𝒌𝒆 𝒉𝒂𝒓 𝒑𝒂𝒓𝒊𝒏𝒅𝒆 𝒑𝒂𝒓 𝑴𝒂𝒕𝒕𝒊 𝒑𝒂𝒓 𝒓𝒆𝒏𝒈𝒉𝒏𝒆 𝒘𝒂𝒍𝒊 𝒉𝒂𝒓 𝒔𝒉𝒆𝒚 𝒑𝒂𝒓 𝑨𝒖𝒓 𝒔𝒂𝒎𝒂𝒏𝒅𝒆𝒓 𝒌𝒊 𝒕𝒂𝒎𝒂𝒂𝒎 𝒎𝒂𝒄𝒉𝒉𝒂𝒍𝒊𝒚𝒐 𝒑𝒂𝒓 𝑻𝒖𝒎𝒉𝒂𝒓𝒆 𝒉𝒂𝒂𝒕𝒉𝒐 𝒎𝒆𝒊𝒏 𝒘𝒐𝒉 𝒑𝒂𝒉𝒖𝒏𝒄𝒉𝒂𝒚𝒊 𝒋𝒂𝒚𝒆𝒏𝒈𝒊 𝑯𝒂𝒓 𝒛𝒊𝒏𝒅𝒂 𝒎𝒖𝒉𝒂𝒓𝒊𝒌 𝒔𝒉𝒆𝒚 𝒕𝒖𝒎𝒉𝒂𝒓𝒊 𝒈𝒉𝒊𝒛𝒂 𝒉𝒐𝒈𝒊 𝑨𝒖𝒓 𝒋𝒂𝒊𝒔𝒆 𝒎𝒂𝒊𝒏𝒆 𝒕𝒖𝒎𝒉𝒆𝒊𝒏 𝒂𝒕𝒂 𝒌𝒊𝒚𝒆 𝒉𝒂𝒊𝒏, 𝒔𝒂𝒓𝒔𝒂𝒃𝒉𝒛 𝒑𝒐𝒅𝒉𝒆 𝑾𝒂𝒊𝒔𝒆 𝒉𝒊 𝒎𝒂𝒊𝒏 𝒕𝒖𝒎𝒉𝒆 𝒉𝒂𝒓 𝒔𝒉𝒆𝒚 𝒂𝒕𝒂𝒂 𝒌𝒂𝒓𝒖𝒏𝒈𝒂 𝑴𝒂𝒈𝒂𝒓 𝑻𝒖𝒎 𝒎𝒂𝒔 𝒌𝒐 𝒖𝒔𝒌𝒊 𝒋𝒂𝒂𝒏 𝒌𝒆 𝒔𝒂𝒂𝒕𝒉 𝒏𝒂𝒉𝒊 𝒌𝒉𝒂𝒐𝒈𝒆 𝑨𝒖𝒓 𝒖𝒔𝒌𝒊 𝒋𝒂𝒂𝒏 𝒖𝒔𝒌𝒂 𝒌𝒉𝒐𝒐𝒏 𝒉𝒂𝒊 𝑨𝒖𝒓 𝒕𝒖𝒎𝒉𝒂𝒓𝒊 𝒋𝒂𝒂𝒏 𝒌𝒊 𝒌𝒉𝒐𝒐𝒏 𝒌𝒂 𝒎𝒂𝒊𝒏 𝒉𝒊𝒔𝒂𝒃 𝒍𝒖𝒈𝒂 𝑯𝒂𝒓 𝒅𝒂𝒓𝒊𝒏𝒅𝒆 𝒂𝒖𝒓 𝒉𝒂𝒓 𝒊𝒏𝒔𝒂𝒂𝒏 𝒔𝒆 𝑨𝒖𝒓 𝒎𝒂𝒊𝒏 𝒚𝒂𝒒𝒆𝒆𝒏𝒂𝒏 𝒉𝒊𝒔𝒂𝒃 𝒍𝒖𝒈𝒂 𝒉𝒂𝒓 𝒊𝒏𝒔𝒂𝒂𝒏 𝒔𝒆 𝑼𝒔𝒌𝒆 𝒔𝒂𝒂𝒕𝒉𝒊 𝒊𝒏𝒔𝒂𝒏 𝒌𝒊 𝒋𝒂𝒂𝒏 𝒌𝒂..

(𝑻𝒂𝒖𝒓𝒂𝒕)

∘❀∘

Sehen tareek tha aur taweel baramda neem roshan. Fazar ki do azane di ja chuki thi aur aasmaan gehra jamuni tha.

Baramde ke aage Kothriya dar kothriya thi jinke darwaze salak daar the aur jinki meli deewaro pe lakeere, nishan, naam se likhe the. Kuch kaidi so rahe the, kuch jaag rahe rhe the.

Yahan zindagi do imtehan ke darmiyan latkti thi.

Siyah dhari safed dhari se mukammal alag ho chuki to fazar ki teesri azan gunzne lagi. Hawao ne moajjan ki awaaz ko apne paro par uthaya. Aur sahem me faila diya.

Allah sabse bada hai.

Allah sabse bada hai.

Aise mein baramde mein do pehredaar tehalte tehalte aik satoon ke saath khade huye the. Aik ne bidi sulghayi aur doosre ko peshkash ki, jise doosre ne mustarad kar ke phir se us hawalati qaidi ki kothri ko dekha, jis ke samne woh khade the.

Pehle sipahi Abdul sakoor ne bhi gardan mori phir istehjaya maska laga kar sar jhatka.

"Mohammadin baar baar us badmijaz aadmi ko mat dekha kar uska dimaag pehle hi kharab rehta hai. Teri hamdardi se woh aur sher ho jayega." Labo se dhuwa chhorte us ne tambiya ki.

Main gawahi deta hoon Allah ke siwa koi aisa nahi jiski ibadat karni chahiye...

(Moajjam ki sada barabar aa rahi thi)

Mohammadin usi taasuf se us ko kothri ko dekhta raha, jis mein safed libaas mein malboos qaidi namaz ka kapda bichhata nazar aa raha tha.

"Kya yun namaz padhne se Allah maaf kar deta hai?" Mohammadin ne mayus awaaz mein puchha.

Qaidi ab asteene barabar kar raha tha jo us ne wazu ke liye uper charhai thi. Us ki pusht un dono ki jaanib thi.

"Qatal kabhi maaf nahi hota aur jo uski tarah apni biwi aur sagge bhai ka qatal karde, woto kabhi maaf nahi hoga." Bidi ki saans andar khechte huye, Abdul sakoor ne fatwa diya.

Mein gawahi deta hoon ke Mohammad "ﷺ" Allah ke rasool hai.

Mein gawahi deta hoon ke Mohammad "ﷺ" Allah ke rasool hai.

"Magar uski biwi aur bhai ke talluqaat the. Us ne ghairat mein qatal kiya tha, Yahi sunne mein aaya hai. Jab hi to chaar saal se jail mein hai."

Mohammadin satoon se tek lagaye, darham se usay dekh raha tha.

Namaz ki taraf aao, Namaz ki taraf aao,

Qaidi ab kapre ke sire par khada takbeerat padhta rafayadeen kar raha tha. Baramde ki madhham roshni mein uska neem rukh Wazeha tha.

Safed shalwar safed kurta bilkul kafan jaisa,

ab gardan jhuki thi. Haath seene par the. Kadre lambe baal do inch ki pony mein bandhe thay. Uska amoomi taasur, saaf sutre oonche mazboot jisam aur khoobsurat naqush wale mard ka padhta tha.

Fala ki taraf aao, fala ki taraf aao.

(Azan hawao mein tarannum gholti sunai de rahi thi..)

"To biwi ko talaq de deta, bhai se talluq tod leta qatal karna zaroori tha? aur log namaz toba-woba ke liye nahi parhte inko rihai chahiye hoti hai." Talkhi se keh kar us ne aik aur kash khencha.

"Magar aik baat manne ki hai, iske ghusse ke alawa ye banda bura nahi tha, tujhe pata hai iska intelligance me ooncha odha tha, achha khubsurat jawan tha. Magar biwi aisi nikli ke tch.. tch .. zindagi barbad ho gayi Faris Ghazi ki"

Ab andar Faris Ghazi ab rukoo mein jhuk raha tha.

Namaz neend se behtar hai. Namaz neend se behtar hai.

Fiza mein terti awaaz mulayamiyat se sutono se takra rahi thi.

"Haan to apna kiya samne aata hai. Ab ye bachega thodi ughm.. laprwahya"

ishteja se sar jhatak kar Abdul Sakoor jane ke liye palta, tabhi Mohammadin kisi saher ke zair-e-asar bola.

"Magar woh keh raha tha, ye riha ho jaayega."

Abdul sakoor ne hairat se ruk kar apne saathi ko dekha.

"Yeh, Faris Ghazi? Riha ho jaayega yeh kisne kaha?"

"Wahi woh lamba, khoobsurat ghunghrale baalo wala ladka jo isse milne har hafte aata hai." Mohammadin ki nigahe hanooz us par markooz thi.

Faris Ghazi ab sazde me sar rakhe hua tha.

"woh iska bhanja? Kya naam hai uska aur uske lagne se kya hota hai?"

"Uski baat hamesha sach ho jaati hai. Pehley usne kaha tha haftawaar peshi hua karegi. Aisa hi hua. Phir us roz woh keh kar gaya ke is hafte yeh riha ho jayega.."

"Na tu uska banjha ye sab tujhe kyun batata raha hai?"

Abdul sakoor bidi labo se hataye mashkook nazaro se Mohammadin ko dekh raha tha.

"Abey mujhe kaha, isi ko hi bata raha tha. Maine to yuhi sun liye."

Allah sabse bada hai, Allah sabse bada hai.

(Azaan ab dhimi padh rahi thi)

"Chhorh yaar! Yeh nahi riha hone wala" usne talkhi se keh kar bidi feki, sulgate bujhate angaray ko dekhne laga.

Allah ke siwa koi aisa nahi jiski ibadat karni chahiye.

Ab awaaz dam tod gayi. Fiza me sukoon chha gaya phir bulbul ne sada lagayi darakhto ne patte jhukaye aur sari makhlook apni ibadat me mashghool ho gayi.

Qaidi salaam pher kar utha. Jainamaz ka kona moda, cuff kalai pe mode aur chalta hua salakho tak aaya. Us ka chehra tubelight ki roshni mein wazeh tha. Us ki aankhe sunehri thi. Bhanwe suked kar tikhi nazro se un dono ko dekhte us ne ungli se apni taraf aane ka ishara kiya.

Mohammadin maikanki andaaz mein ka kareeb aaya. Abdul sakoor itna mutasir na tha. Magar usne bhi pairwi ki.

"apne kaan saf kar ke dhyan se suno." Woh tez nigaho se dono ko bari bari dekhte hue bola.

"Pehli baat vo mera sagga nahi, sautela bhai tha. Dusri baat mere bhanje ka naam saadi yousuf hai aur aakhri baat, agar aainda tum mujhe meri mulakat ke aukat mein apne kareeb bhatakte nazar aaye to agle din yahan pehra wheel chair pe doge. Samajh mein aaya?"

"TUJHE TO MEIN ABHI.." abdul sakoor gusse se aage badha.

Magar mohammaddin ne uske seene par haath rakh kar piche dhakelte "Chhorho, jaane do" keh kar use roka aur wapas le gaya.

"Kya... haan? Abhi kya?" salakhe thame, faris ne bhinche jabde aur ghusili aankho se pukara. Magar mohammaddin bamushkil samjha bujha ka usay dur karne mein kamyaab ho gya tha.

Faris ne sar jhatka aur wapas so liya. Subah ki safedi aahista aahista phail rahi thi.

☆☆☆

- میں زخم زخم ہوں پھر بھی دکھائی نہ دوں..

"𝙼𝚎𝚒𝚗 𝚣𝚊𝚔𝚑𝚊𝚖 𝚣𝚊𝚔𝚑𝚊𝚖 𝚑𝚞, 𝚙𝚑𝚒𝚛 𝚋𝚑𝚒 𝚍𝚒𝚔𝚊𝚑𝚒 𝚗𝚊 𝚍𝚞"

∘❀∘

Thik usi waqt islamabad ke dusre hison par bhi fajar tuloo ho rahi thi. Us upper middle class colony mein ek ghar ki khidkiya neele andhere mein roshan thi.

Chhote se laun ke samne launge ki khidki nazar aati, magar ghar ki bagli gali se andar jao to pehle kitchen ka band darwaza aata aur phir ek bedroom ki khidki jisse chehra laga kar dekho to andar lamp jal raha tha aur carpet pe ek ladki namaz padh kar salaam pher rahi thi.

Bed ki side table ke jalte lamp ke sath mobile, paani aur chnd dawaiyan rakhi thi. Aisi dawaiyan jo gurde ka mariz istemaal karta hai jis ko donar gurda laga ho.

Vo namaz khatam karke, bina dua mange uthi, jainamaz ussi maiz ke khaane mein rakh di. Dupatta utar kar baal aazad kiye. Phir palat kar study table tak aai to uska chehra saamne aaya.

Wo saaf mar kadre zard rangat ki daraz kad dubli patli si thi Naqoosh mutnasib, aankhe badami rang ki, gehri bhoori palkein mudi hui aur naak mein diamond ki nanhi si long, bilkul moong ke daane jitni. Vo bohot khubsurat nahi thi. Magar uske baal khubsoorat the. Gehre bhure, sar se kaan tak sidhe ayr phir mote mote curls ki surat ghunghriyale ho jate. Vo steps mein the. Samne se thhodi tak,phir kandho tak aur piche kamar tak aate.

Usne almaari khol kar ek file nikaali aur bedhyaani mein ek dabbe ko ludka diya. Jisse akhbaar ke chand tarashe phisal kar bahar gire, magar chunki usne dekha nahi tha. So study table pe aa bethi aur file khol li. Akhbaar ke tarashe uske kadmo mein gire rahe. Kamre mein neem andhera tha. Wo theek se padhe na jate the. Magar phir khidki ke bahar subh failti gayi aur roshni andar bharti gayi aur un ki tehreer wajeh ho gayi.

Un taraasho ki surkhiya keh rahi thi.

"assistent director Naib waris ghazi purisraar taur par kamre mein murda paaye gaye. Police maut ko khudkhusi, azeezo akaarab ne katl karaar de diya. Kamre se laptop aur eham documents bhi gayab....."

"Islamabad ke posh ilaake mein naamaloom afraad ki firing se ek khaatoon jabahak, aik zakhmi, jawahak khaatoon kuch roz kabl mubaina taur pr khudkhusi karne waale naib director ke bhai ki ehliya thi".

"zakhmi khatoon ke dono gurde firing ke natije mein zaya ho chuke hai, naiz ka taaluk....."

"Naib director ke katl ka amoma haal, police ne sautele bhai Faris ghazi ko giraftaar kar liya. Police ke mutabik apni biwi aur rishtedar khatoon pe firing ke piche bhi usi ka haath......"

Do haatho ne tezi se vo kaagaz samete aur un ko dabbe mein daalte hue almaari band ki. Phir sidhi ho kar khadi hui.

Wo tayaar ho chuki thi aur ab gile ghungriyale baal brush kar rahi thi. Fazar bet-te kaafi der ho chuki thi aur bahar har taraf sunehri roshni thi.

Us ki khidki ke bahar patli gali mein wapas chalte jao to ab kitchen ka darwaza khula tha aur jali se baate karne ki aawaze aur nashte ki khusboo aa rahi thi.

Mulaazim ladka khada chai dam pe rakh raha tha. Sath ek hatti - katti us ke tabke ki aurat khadi thi.

"ve sadakat! Maa ka sara paigaam samajh mein aa gaya na? Ab mein tassali se garaye chali jau?" Vo jese koi lambi chaudi baat samait rahi thi. Lakde ne "haa na chachi!" kehte tashahfi karwai. Chachi ne jaise faragat se idhar udhar dekha.

"ye tu apni baji na nashta bana raha hai?" us ne malkin ko asbat me istafsaar kiya.

"haa.... Aur sahab ka bhi.. Baaji ke abbu.. Do log hi to hai ghar mein."

"Naa to teri baaji ki shadi vadi nahi hui?"

"Sahab ne bohotttt waqt pehle." Anda todte hue "bohot" ko bohot khencha.

"Baji ki mangni bhi hone wali thi, shadi bhi hone wali thi, magar phir bazar mein firing hui aur baji ko bhi goli lag gayi. Bas dono gurde zaya ho gaye. Kisi angrez aurat ne gurda to de diya aur lag bhi gaya, par mangni tut gayi. Phir baji ne shadi nahi ki."

"Tch... Tch... Bichari..satais athais ki to hogi?"

"Arey...tentees chauntis ke kam ki nahi hai baji, lagti chhoti hai." Sadakat ne fakhr se kehte hue anda tel pe daala. Sarar sarar ki aawaz aai aur tel mein bulbule banne lage.

"Tujhe kaise pta uski umar?" chachi ne maskook nazron se ladke ko dekha.

"umar ka nahi, saalgirah ka pata chal jaata hai. Vo har saalgirah pe saadi bhai card aur phool jo le aate hai."

"saadi bhai kon?"

"Le... tujhe saadi bhai ka nahi pata?" sadakat ne anda palat te malamti nazro se chachi ko dekha.

"baaji ka bhatija hai, bade sahab ka pota."

"dekh... aise hote hai bhatije, aur tu garai aata hai to majaal nahi ke chacha-chachi ko shakal bhi dikha bhi dikha de." Sath hi ladke ki pusht pe dhamaka (punch) jada. Wo bilbila ka reh gaya.

"isiliye to baaji apne bhatije se bada pyar karti hogi."

"Kahan?" bura muh banaye sadakat ne usi andaz mein kaha. "Woh to saadi bhai se baat bhi nahi karti, milti bhi nahi hai, wo tab hi ghar aata hai jab vo nahi hoti. Vo usse naraz hai."

"aaye haaye kyun?"

"purani narazgi hai, baaji ko jo goli lagi thi, wo saadi bhai ke mamu ne maari thi. Bas tab se us ke talukaat ache nahi hai" woh sar jhukaye kam karte hue tabsira kiye jaa raha tha. Chachi ne pursoch hunkara bhara.

"To isiliye baji ke bhai ka khandan un ke sath nahi rehta?"

"Oh nahi chachi! Wo to hamesha se alag rehte the. Phir khaandan mein aur hai bhi kon? Baaji ke ek hi bhai the. Saadi bhai ke abu, arsa hua faut ho chuke. Un ki wafaat se bhi saalo pehle se unhone ghar alag kar liya tha. Un ki biwi ki apni saas, matlab baaji ki marhuma ammi se nahi banti thi, phir bhi baji bada khayal kiya karti thi apne bhatijo ka, saadi bhai log teen behen bhai hai, ye to bas ab kuch salo se un ki bol chal..."

"sadakat! Agar ap humare sajraye nasab par roshni daal chuke ho to nashta table pe laga doge?"

Sadakat ke haath se chimta girte girte bacha. Chachi, bhatija ghabra kar palte.

Wo coat baazu pe daale dusre hath mein purse liye chokhat par khadi thi aur ye fikra usne bina kisi gusse ya tanz ke, bohit sadgi ve narmi se adaa kiya tha.

"laya baaji bas..." Wo jese current kha kar ek dam tez tez kaam karne laga. Chachi ne bhi khafif sa salaam kiya. Wo usi narmi magar sanjidgi se jawab de kar raahdari mein aagechalti gayi aur heel ki farsh se takraati aawaz gunjti gai.

Rahdari ke saamne bada sa living room tha. Us ka aadha hissa sofo se arasta tv lounge tha. Baki nasf mein dinning table bichi thi. Sarbarahi kursi ki jagah ek muammar sahab wheel chair pe bethe ainak naak pe iamaave akhbaar dekh ainak naak pe jamaaye akhbaar dekh rahe the.

Wo dahine haath ki pehli kursi pe aa bethi, cheeze ek taraf rakhe, plate uthai, kata (fork) usme rakha.

"aaj ghar kab aaogi?"

"jaldi aane ki koshish krungi"

Wo bohot thehre hue narm andaz mein bolti thi aur us ke fikre ek rawani mein labon se adaa hote the aur vo hnesha baat khatam kar ke saans liya karti thi. Iske bawjood har lafz waajeh aur clear hota tha.

"Zumar!" unhone pukara.

Zumar ne jawab mein sirf "hmm" kaha.

"kal ki tarikh yaad hai?, kya tha?"

"Koi cricket match tha?" Zumar ne usi itminan se puchte hue napkin goud mein bichaya.

"Saadi ki saalgirah thi. Wo pachhees saal ka ho gaya hai."

Us ke haath ki harkat sust hui, bhoori aankho mein saya sa lehraya. Wo ek dam chehra mod kar sadakat ki taraf mutawaja ho gayi jo lawaazmaat maiz nar rakh raha tha aur Zumar se nazre dam chehra mod kar sadakat ki taraf mutawaja ho gayi jo lawaazmat maiz par rakh raha tha aur zumar se nazre bhi nahi mila pa raha tha. Bade abaa bhi akhbaar ko hi dekh rahe the.

Sadakat andar chala gaya to unhone kaha. "kya tumhe ye yaad hai ki tum kya kya bhulne lagi ho? Chaar saal se us ke ghar jana bhul gayi ho, dedh saal se us ki shakal dekhna bhul gayi ho."

Zumar ne maiz ki wast par rakhe guldan ko dekhte hue cup labo se lagaya, boli kuch nahi. Us ka chehra sapaat tha.

"Wo tumhari koi saalgirah nahi bhulta."

"mein use call kar lungi."

"Call karna, parwah karne ke mutaradif nahi hota."

Zumar ne sanjidgi se bade abu ka chehra dekha jo ab use hi dekh rahe the.

"Wo mera bhatija hai, mein us ki parwah kyun nahi karungi?"

"To phir us se narazgi khatam kyun nahi karti ho?"

"mein usse naraz nahi hun, saadi mere liye kya hai, aap jante hain aur koi bhi cheez is hakikat ko nahi badal sakti."

"To phir usse milti kyun nahi ho?"

"Thik hai, aap humara nashta spoil karna chahte hain to aise hi sahi." Piyali pich pr rakh kar vo mukammal taur pe un ki taraf mutwaja ho gayi.

"Wo mujh se kyun nahi mila jab mein bimar thi? Abba! Mere gurde zaya ho gaye thi. Ek ajnabi aurat mujhe gurda de sakti hai, magar mera bhatija mujhse milne nahi aa sakta kyunki us ki padhai zyada jaruri thi? Abba! Wo mera beta tha. Mera bhai tha. Mera sab se acha dost tha. Magar wo mere pass nahi tha, jab mujhe us ki jarurat thi. Wo england chala gaya aur haan! Wahan se mujhe call kar leta tha. Magar call karna parwah karne ke mutradif to nahi hota na?"

"Tum us ki ye baat darguzar kar deti. Agar usne ye na kaha hota ke Faris begunah hai aur...."

Zumar ruk gayi. Us ke taasuraat badle, aankho mein gehra karb, takleef, gussa bhara.

"Faris ghazi ka naam mere saamne mat liya Kare, us sakhs ne mere sath kya kiya. Aap bhul gaye hain to mein yaad kara deti hun."

Uska jaise nashta haram ho gaya tha.

Labo ko napkin se thapaka kar baal kaan ke piche udsa aur un ki aankho mein dekh kar sapaat lehje mein boli.

"Wo... ap ki bahu ka bhai.... Us ne chaar saal pehle meri zindagi barbad kardi thi. Us ne apni biwi aur mujhe ek jagah bula kar, hum dono ko shoot kar diya, taake mein asal target samjhi jau. Un teen goliyo jo mujhe kamar mein lagi thi ke us sakhs ne meri pusht pe hi to hamla kiya tha. Mere sirf gurde hi nahi chhine, har chiz chhini aur saadi... Usne tab bhi kaha tha, ab bhi kahega ke us ka mamu begunah hai, great!"

Dono haath utha kar us ne jaise kisi nadeeda hasti ko shabaashi di.Us ka rang nichhud chuka tha aur vo shadeed disturb nazar aa rahi thi.

"usne saadi ke bade mamu aur apni biwi ko mara. Ye unka apna mamla hai, magar mujhe bhi marna chaha tha aur ye mera mamla hai. Magar abba! Iske bawajood mein Faris ghazi ke case ko follow nahi karti, mein khud ko dedh saal se us case se alag kar chuki hu, apna bayaan bhi wapas le chuki hu, kyonki jab us waqai ka zikr kiya jata, mujhe naye sire se takleef hoti hai. Please mujhe kams kam nashte ki maiz pe ye takleef mat diya kare."

Bohut dukh se kehte hue apni chize samet ti wo uthh khadi hui. Bade abba ne khamosh taasuf se use jaate dekha, Phir uski aadhi chai ki pyaali ko. Har "Saadi.." se shuru hokar "Faris" pe khatam hone waali guftgoo ke natije mein chai, nashte aur khane yoon hi adhure reh jaate the.

Fazar ko kaza hue kai saate beet chuki thi aur suraj abhi tak thhanda tha. Sheher ke mazafaat mein ek posh ilaake mein zindagi itni subh bhi yun bedaar aur chaakon choban thi jaise kabhi soi hi na ho.

☆☆☆

-پھر حشر کے ساماں ہوئے ہیں...

Phir Hashar ke sama'an huay hain.

∘❀∘

Fajr ko qaza huay kai sate beet chuki thi aur sooraj abhi tak thanda tha. Sheher ke masafat mein aik posh ilaqay mein zindagi itni subah bhi yun bedaar aur chaq o choband thi jaise kabhi soi na ho.

Wo ek buland aur aalishan mehal numa ghar tha. Bahar security check points, musalla gaurds, current se labrez taare thi. Andar imarat sabzaa zaar ke darmiyaan mein khadi thi aur aage pichhe, unchi nichi pahadiyo ki manind laun kahi naseb mein jaata, kahin upar uth jaata.

Lawn mein bawardi mulazim choksi se kaam nipta rahe the. Kisi bade event se pehle hone wali planning...

Ek sunehre bob cut waali ladki jo dudhiya rangat aur dilkash naakoosh ki malik thi, haath se mukhtalif jagaho pe ishara karte, event organizer ko hidayaat de rahi thi, jise organizer mushtadi se sar hilata dairy pe note karta jaa raha tha.

Door se ek philipino mulaazim jo khush shakal aur ba etmaad thi aur safedshakal aur ba etmaad thi aur safed blause, skirt aur tights mein malboos thi, chalti hui aai aur us ladki ke samne muskura kar, sar ko kham de kar pucha.

"Kya aap ko kisi chiz ki jarurt hai miss Shereen?"

Sehreen organizer ko bata rahi thi ke use phool kaise aur kidhar chahiye, us ne ruk kar bezar nazar us par daali.

"Sirf itna Fiona ke tum har do minute bad aa kar mujh se ye sawal mat pucho." Aur naak sikood kar mud gayi. Fiona ki muskurahat phir bhi barkarar rahi. Sar ko kham de kar vo vahan se chali aai. Yakinan vo amle ke supervisor thi, tabhi bohot tamkanat se thodi door agency ki taraf se aai faazil maids ke sath ja khadi hui.

"sab thik ja raha hai?" us ne tahakum se jayeza liya.

"Perfect! wese abhi party mein ek hafta hai. Hum kuch jaldi tayaari nahi kar rahe?"

"Um hmm yahan har koi waqt se pehle kaam karne ka aadi hai aur ye hasim kardar ki beti ki saalgirah hai. Koi aam bat nahi." Fiona ne kadre fakhr se jataya.

Mulazma ne mud kar be-ikhitiyar Shehrin ki simt dekha.

"Yeh Hashim Kardar ki wife hai na? Inhi ki beti ki salgirah hai."

"Haan magar inki alehdgi ho chuki hai. Yeh yahan nahi rahti, Party ke liye aayi hai."

"Aur idhar kon rehta hai?" Mulazma ko dilchasp huyi to uss taraf ishara karte hue jahan lawn dhalwan mein ja kar khatam hota tha poochha. Wahan aik chhoti si aam ki imarat thi jaise annex ho.

"W-Woh to Faris Ghazi ka portion hai." Fiona na bura sa munh banaya.

"Woh kon hai?"

"Hashim Sahib ki Phupho ka beta hai magar woh ghar muqfil hota hai. Kyun ke Faris jail mein hai." Phir dheemi awaaz ki. "Usne apne sotele bhai matlab apne baap ki pehli biwi ke bete ko qatal kar diya tha aur apni biwi ko bhi."

"Ohhh," mulazima ki aankhein hairat aur tajassus se phail gayi. "To us ke muqtul bhai ka khandan yahan nahi rehta?"

"Bataya to hai woh us ke baap ka beta tha. Hashim Sahib us ki maan ki taraf se cousin hue to in soti le rishtedaro ka yahan se kya taluq?" Gossip ka lutf khatam hua to woh moun bana kar andar mar gayi.

Ghar ke andar daakhil hotay hi us ki karofar bhari chaal mein aajizi aa gayi. Us ne living room paar kiya, jis mein seerhiya upar jati dikhayi deti aur ghar ki chaar manzilein khatam hone ke baad chhat aati. Yun living room bohot aali shan taseer dalta. Phir woh dining room mein aayi aur sar barahi kursi adab se khechi. Yahan se living room nazar aata tha aur usay apni maalkin bhi aati nazar rahi thi.

Woh muskurati hui baarik heels se tez tez chalti aa rahi thi. Tights pe angrezi tarz ka baghair aasteen ka ghutno se ooper aata libas pehn rakha tha. Halke bhure dye bal seedhe aur kamar pe the aur sherni jaisi aankhe thin, chehra khoobsurat aur mulayam. Woh yaqinan kaafi umar ki thi, magar be-had smart aur tarotaaza.

"Good morning Mrs. Jawahirat!"

Muskurakar jawab deti woh sar barahi kari pe malka ki shaan se baithi. Napkin goud mein bichaya aur ba adab khadi Fiona ko sheri lehje mein mukhatib Kiya.

"Mere bete kidhar hain?"

"Hashim taiyar ho rahe hain aur Nosherwa abhi nahi uthey."

Jawahirat ne jawab diye bina plate apne qareeb ki.

"Ma'am aap ki filler treatment ki appointment aaj shaam ki hai. Aap ne reminde karwane ko kaha tha.."

"Aur maine yeh bhi kaha tha ke aisi baatein awaaz madhamm rakh kar kiya karo." Usi sheri muskurahat se us ne Fiona ko dekh kar kaha

"Aur apna make up kam karo. Mujhe staff ki be-rabtgi bilkul pasand nahi."

"Sorry ma'am.." Fiona ki muskurahat uran choo hui. Us ne jaldi se rumal (handkerchief ) se lipstick raghri, Jawahirat ab nashta plate mein nikal rahi thi.

Sidhiyo ke upar pehle kamre ka darwaza band tha. Andar AC ki khanki aur mardana perfume ki mehka ne fiza ko muwwtir kar rakha tha. Woh dressing table ke sheeshe ke samne khada tie ki knot bandh raha tha. Coat qareeb hi tanga tha. Baal mathe pe peeche ko set kiye wajiha nuqoosh, shandaar shakhsiyat aur purkashish siyah aankhe bilkul Jawahirat ke jaisi.

Dafatan tie darmiya mein chhod kar us ne waqt dekha aur mobile uthakar chand button dabaye phir aik call milayi.

"Bajwa Sahab! Abhi aap ko aik email bheji hai. Usko dekhne ke baad aap mujh se yaqinan baat karna chahenge..." Agle ki baat sune baghair muskurakar phone band kiya aur rakh diya. Tie ki knot bandh chuka to phone baja aur phir bjte gaye. Chhe saat calls aayi. Magar usne nahi uthaya. Zara khamoshi hui to usne aik aur number milaya.

"Khawar kaam ho gaya hai, us ladki jo bhi naam hai us ka, us ko gayab hone ko keh do, Ab woh Bajwa se nahi mile gi aur dopaher tak meri secretary uski payment clear kar degi..." Call kati hi thi ke phir se Bajwa sahab ki call aane lag gayi. Us ne muskara kar "yes" kiya aur aaine mein dekhte hue khud par perfume chhidakte hue bola.

"Kaisa laga mera tohfa? Agar tum chahte ho ke mein is patmari betiyo ki raye lu to aaj board ke ejlas mein tum meri qarardad ke haq mein vote doge. Warna mein kitna be rahem hoon tum jante ho.." Doosre ka ghussa etehjaj darkhwast kuch bhi sune baghair us ne phone rakh diya. Khud par do teen spray mazeed kiye. Cuff links lagaye coat pehna aur bahar nikla. Rahdari mein mojood bawardi mulazim ne foran andar jakar uska briefcase uthaya.

Woh sidhiya utar kar neeche aaya to Jawahirat jo ghoont ghoont kar juice pee rahi thi, usi ko dekh rahi thi. Us ne qareeb aakar uska maatha choomha phir daaye haath ki kursi kheenchte hue bola.

"Mera khayal tha Mrs. Kardar ab tak office ja chuki hogi..." Saath hi Hashim ne abroo se fiona ko jane ka ishara kiya. Woh foran gayab ho gayi.

"Tumhari ex-wife subah sawere aa gayi to mein kaise jaati?"

"Sherry kyun aayi hai?" Hashim ne toast pe spread lagate hue ghair dilchaspi se poocha. Jawahirat ne nazakat se shaane uchkaye.

"Sonia ki salgirah hum ne usay uske ghar nahi karne di to woh hafta pehle se tayyari shuru kar ke intiqam le rahi hai..."

"Sonia ko saath layi hai?"

Jawahirat ne nafi mein gardan hilayi.

"Anyways Bajwa ka vote mere paas hai. Yun aaj Abdul Samad ko hum vote out kar denge.."

Jawahirat khule dil se muskaraayi.

"Yeh tum ne kaise kiya?"

Hashim muskraate hue shaane uchaka kar bola. "Hashim sab sambhal sakta hai.."

"Siwaye is ghar ke staff ke matlab koi kaam ka banda hai yahan? kabhi koi meri car maar deta hai kabhi mera suit barbad ho jata hai, hadd ho gayi" awaz par dono ne us taraf dekha. Trouser aur shirt me Nosherwa bistar se uth kar aaya tha. Aur bahut bidge mood me aaya tha.

"Aur ab kya hua hai?" Hashim ne fork aur knife se tukda todte huye. Muskura kar usay dekha.

"Mere suit barbad kar diya is jahil Riyaz ne, Aap uski payslip us ke hawale karde mummy, Maine usay farig kar diya hai..." Seb (apple) uthakar usme daat gadte huye khafa khafa sa ho kar bola.

Woh chobis pachchis saal ka khush shakal nojawaan tha. Hashim jitna nahi magar achha tha. French cut aur balo ki uljhi bikhri spikes, aankho mein laparwahi aur bezari. Jawahirat ne napasandgi se uski baat suni.

"Tum kab bade hoge? Jab Hashim tumhare umar ka tha to dua taa chhota hargiz nahi tha.." Hashim ne maa ke haath pe haath rakha aur narmi se toka.

"Mein samjha duga na!" Aur phir Nosherwa ki taraf mutwajja hua.

"Aaj tum mujhe office me Nazar aana chahiye."

"Aauga bhai magar apne waqt pe.." Us ne ab muskurakar be-nyazi se kaha. Hashim ne ba-mushkil muskurahat roki. Usey Nosherwa par bohot kam ghussa aata tha.

"Subah ho chuki hai sheru, ab tum bilkul nahi soge aur taiyar ho kar office aao ge.."

"Okay!" Woh la-parwai se keh kar seb khane laga. Hashim ka phone phir se bajne laga. Usne juice ka ghoont bhara aur mobile kaan se lagaya.

"Hashim Kardar?" Niswani awaaz me ishtisaar kiya.

"Aage bolo.." Us ka lehja be-lachak aur sapat ho gaya.

"Main Kamran Hayat ke office se baat kar rahi hoon. Please line par rahiyega, Kamran sahab baat karenge."

"Apne boss ko bolo ke main secretaries se baat nahi karta. Usay mujh se kaam ho to mujhe khud call kiya kare." Be-nyazi se keh kar us ne mobile band kar diya.

Jawahirat aur Nosherwa ne apni khafgi bhoola kar muskurate magar fakhriya nigaho ka tabadla kiya. Hashim ka mobile phir se baar baar bajne laga to sheru ko kehna para.

"Utha lein bhai! Bechare ki call.."

"Shaam ko uthaoonga. Usay poora din khwaar hone do. Kaam ho to Hashim Kardar yaad aa jata hai." Woh nashta khatam kar ke ab uth raha tha. Jawahirat ne gardan uthakar usay dekha.

"Court ja rahe ho?"

"Pehle office phir court... General Naveed ke bete wala masla waqt par na kiya gaya to zumar, settlement se inkaar hi na kar de. Us magroor aurat ka koi bharosa nahi."

"Zumar ko mera salam keh dena." Jawahirat ne dilchaspi se kaha.

"Sure" Haath saaf kar ke us ne mobile uthaya hi tha ke woh phir se bajne laga.

Hashim ne "Haan Khawar bolo" keh kar ujlat mein call receive ki thi. Magar doosri taraf jo kaha ja raha tha usay sun kar woh bilkul ruk gaya. Aankhein sikud li aur aahista aahista wapas baith gaya.

"Hmm acha, khair, pichle do mahine mein woh kis kis se mila hai apne wakeel ke ilawa mujhe aik aik mulaqat ki tafseel do. Tumhare paas das minute hai." Sard lehje mein keh kar us ne phone band kar diya to woh dono uska chehra dekh rahe the. Us ne sirf aik lafz kaha. "Faris!"

Jawahirat ke haath se seb ki qaash phisli. Aankho mein uljhan ubhri.

"Fa-ris ka kya zikar?"

"Uska case... Aaj us ka faisla mutawaqqa hai. Woh disturbed lag raha tha."

Jawahirat saans lena bhool gayi.

"Aur tumhein ab pata chal raha hai?"

Hashim ki aankho mein khafgi ubhri.

"Main arazi ke muqadmat mein phansa tha, Us taraf dhyan nahi gaya. Mujhe ajeeb lag raha hai ke uska faisla achanak se aane wala hai."

Dining hall mein khamoshi chha gayi. Jawahirat ki muskurahat ab ghaib thi. Woh bilkul yaktak Hashim ko dekh rahi thi.

"Don't worry, woh riha nahi hoga," Hashim ko kehna pada.

"Usay riha hona bhi nahi chahiye aur tum is baat ko yaqini banao ge, Hashim!" Woh be-had mustarif lag rahi thi.

"Main sambhal luga mummy!"

"Hamaare us cousin ke riha hone ka matlab hai ke adalat ke nazdeek woh qatil nahi hai..."

"Yaqeenan agla sawal yeh hoga ke phir qatil kaun hai?" Nosherwa ne seb khate hue kaha. Dono ne be-ikhtiyar use dekha. Uska hilta munh ruk gaya.

"Yunhi keh raha tha," Us ne kandhe uchkaye.

"Yeh baat main dobara tumhare muhn se na sunu sheru," Jawahirat ne ba mushkil se ghussa zabt kiya, phir Hashim ko dekha. Jaise khud bhi wohi sawal pooch rahi ho. Uski sherni jaisi aankho mein tapish thi.

Hashim ne zara se kandha uchkaye

"Faisla uske khilaf hi aayega, don't worry. Woh baahar nahi aaye ga. Aur aajaye bhi to mujhe koi farq nahi padta."

Tabhi uska phone phir baja. Usne foran call receive ki.

"Haan Khawar hmm! achha! ." sanjeeda aur sapat taa'surat ke saath wo sunta raha phir phone rakh diya.

"Saadi.. Saadi Yousuf!" Usne hole se kaha. "Saadi hai asal masla"

Nosherwa ka chehra yun ho gaya jaise usne zehrila seb nigal liya ho.

❏❏❏

Assalamualaikum pretties kese hai aap sab! Ummid hai khairiyat se hoge, darasaal me ye novel 8th baab se hi translate karna chah rahi thi magar jo pehele publish translation hai perhaps Wattpad unhe remove kar chuka hai, so me is novel ko shuru se translate kar rahi hoon, I'll try to translate this one ASAP! Hopefully you'll understand :))

fiamanillah!! take care of yourself..

-saba