Haneen Saadi ke saath aayi thi. Aur jitni dair woh musalsal josh se bolta raha, saadi aur phupho ko apne scholarship ki tafseel batata raha, Haneen utni dair me cake ke teen tukde kha chuki thi jo Saadi ne raste se liya tha.

"Yani ke tumhari saari parhai muft? Aur akharajat bhi? Wah bhai! Yeh toh kamaal ho gaya."

Bari ammi bohot khush thi. Bar bar Saadi ke sar aur kandhe pe haath pher kar kehti. Phir foran izafa karti,

"Nudrat se umeed nahi thi ke bacho ko parha payegi. Asal me tumhara baap bohot laayak tha. Tum aur Hannah usi pe gaye ho."

Aur Saadi aur Jannat ke liye yeh baatein be-asar thi. Bari ammi ke paas ek poori fehrist thi ke falan sadi me falan ke ghar Nudrat ne mujhe yun aur yun kaha, aur Nudrat ke paas bhi aisi hi ek charge sheet hamesha tayar rehti thi.

Aur in dono ki ghair maujoodgi me Saadi bas ek kaam karta tha…

"Har shakhs ko apna kaam karna chahiye. Allah ne mard ko do kaan is liye diye ke ek se sun kar doosre se nikal de. Aur aurto ko do isliye diye ki do se sun kar munh se nikale."

Aur Zumar khamoshi se muskurati tek laga kar baithi use sun rahi thi jo jab se bole ja raha tha.

"Ma'am ne mujhe unka naam tak nahi bataya. Mera bohot dil tha ke main unse ek dafa mil kar unka shukriya hi ada kar saku." Wo yaad kar ke phir se udaas hua. Haneen ne idhar udhar dekha. Koi uski taraf mutawajjeh na tha. Usne aage ho kar chautha tukda nikala, peechay hui aur poori dil jami se khane lagi.

"Zumar" Saadi lehza bhar ko chonka. "Aap to madam ko Janti hain na ap unse pata karwa dena ke mujhe sponsor kisne karwaya hai." Zumar hanooz muskura rahi thi mutmain or pursakoon saadi ke sawal par wakfe se boli, "Theek hai, main pata karwa dungi. Agar unhone na bataya to mere itne zariye hain ke main wo naam dhoond lungi, lekin..."

Phir ek lamha ruk kar boli, "Saadi! Ehsan ka badla kya ehsan ke siwa bhi kuch ho sakta hai? Agar tum jaana chahte ho to theek hai, magar tumhein nahi lagta ke agar koi tum par paisa laga raha hai aur badle mein sirf itni khwahish hai ke wo be-shanakht rahe, to tumhein uski is khwahish ka ehtram karna chahiye?"

Saadi ke lab 'O' me sukde. Haneen ne ab apna panchwati tukda uthaya.

"Yeh to maine to ye socha hi nahi," usne dheemi awaz mein kaha.

"Haan, Zumar theek keh rahi hai. Us aadmi ke paas hoga faltu ka paisa. Ye na ho ke tumhare aise qadam se naraaz ho kar fees dene se inkaar kar de," bari ammi samajhdaari se kehne lagi. Zumar ki muskurahat hanooz barqarar thi.

Saadi ne samajh kar sir hila diya. Phir yaad aane par poocha, "sach! Jab hum andar aaye to wo Khokhar sahab bahar nikal rahe the. Ye wahi property dealer hain na jin ke paas aapne mujhe bheja tha jab hum ghar badalne ka soch rahe the?"

Zumar ki muskurahat ek lamha bhar ke liye halki hui, phir wo dobara muskurane di. Bari ammi ne bhi chonk kar use dekha.

"Haan, unki jayedad ka case main deal kar rahi thi. Asal mein unki bahu ki apni saas se bilkul nahi banti, tabhi beta hissa maang rahi hai. Mera to khayal hai ke wo bahu kaafi samajhdar ladki hai aur saara kasoor saas ka hi hoga magar.."

kin ankhiyon se maa ko dekhte huye wo saans lene ko ruki. Bari ammi kafi josh me aage ho kar kehne lagi.

"Kyun? Tumhein kya pata saas ke saath kya sulook karti hai jab—"

"Chhodiye na. Hame kya bari ammi! Aaiye, cake khaate hain."

Saadi jaldi jaldi kehta meiz ki taraf Rukh mor kar batha to cake nafasat se kata adha bacha tha or aur doosri taraf sofa par baithi Haneen Yousuf bilkul saaf haath moonh ke saath hatheli pe thodi jamaye Allama Iqbal ki tarah khala mein ghur rahi thi. Saadi ne use ghura aur Zumar ne muskurate kar dekha.

Wo Saadi ko nazar andaz kar ke zumar ko dekh kar sharmila sa muskurai,

"Mera andaza tha ke aaj tum log aaoge, is liye maine Nihari kebab bhi mangwa liye the. Pehle wo khate hain, phir cake."

Zumar kehte hue uth khadi hui. Haneen ki aankhein chamak uthi. Saadi bas sir jhatak kar reh gaya.

Wo us na-maloom shakhs ki wajah se itna uljha hua tha ke ghar jaa kar bhi Haneen ko batane ka iraada tark kar diya.

Aur chokhat mein zara ot mein khade bade abba ne taasuf aur fikar mandi se Zumar ke chehre ko dekha, jo bohot itminan se muskurate hue kitchen ki taraf ja rahi thi. Wahan koi pachtawa, koi malaal nahi tha. Malaal to unke dil mein bhi nahi tha, magar zehan mein pareshaani zaroor thi.

Saadi ab badi ammi se pooch raha tha ke wo uske maamu ke cousin ki shaadi mein aayengi ya nahi? Aur bade abba gehri saans lete andar chale aaye. Abhi unhein Saadi ka surprise pehli dafa sun kar us par pehla ta'assur dena tha.

☆☆☆

Kardar khandan ka qasr mausam-e-garma mein bhi bahar ke phoolo se saja tha. Walima ki dawat ka theme phool the aur wo jagah jagah bikhe re gaye the. Lawn mein mustateel maizo ke gird sofe the aur mehmaan kahin baith rahe the, kahin chal phir rahe the.

Un sab mein markaz-e-nigaah wo joda tha jiske ijaza mein woh sab jama the. Hashim ka suit siyaah tha aur Shehrin ka gown moti jaisa safed. Sar pe bareek kamdar dupatta kandhon ke peeche karta tha aur wo Hashim ki kohni ko thaame hasti hui uske saath chal rahi thi. Kaafi dair se wo dono aage peechhe mehmaano mein ghoom rahe the. Unhein dekhti nigahon mein hasad, raqabat, khushi, khalus mohabbat gharz har tareh ke logon ka har tareh ka jazba maujood tha.

Sirf ek shakhs ki nigah mukhtalif thi.

Saadi aur Haneen ki maiz par mojood Waris bohot khamosh aur teekhi nazron se Hashim ko dekh raha tha. Wo khud Faris se zara bara, saaf rangat aur glasses wala khush shakal mard tha. Uske andaz mein is khandan ke liye qadare na-pasandidgi thi aur wo shayad sirf Faris ke bulane par aaya tha.

"Khala aur bacho ke baghair kaisi guzar rahi hai, maamu?" Saath baithe Saadi ne mukhatib kiya to Waris ne Hashim se nigah hata kar use dekha.

Saadi apne akelote suit mein, jo uspe zara dheela tha, bada bara lag raha tha.

"Bas abto teen saal reh gaye hai." Wo dheema sa muskuraya.

"Aap Hamari party mein Kyon Nahin Aaye?" Samne hatheli per Thodi girae Bore Si beti Haneen Ne narazi Se poochha. "kya is Katto Begam ko khane Ke Siva Kuchh Nahin soojhta saadi? "

"Ye mere sawal ka jawab nahi hai," Angrezi filmo ke saare ba'etamad aur turant jawab Haneen ko yaad the.

"Main masroof tha. Aur phir jis party mein tum log apni phuphi ko bulate ho, uspe mera aana nahi banta. Achha nahi lagta."

"Achha." Haneen chup ho gayi. Phir boori ho kar idhar udhar dekhne lagi.

Tabhi Hashim apni dulhan ke hamrah unki maiz tak aaya. Wo teeno uske liye khade ho gaye.

"Bas... baaqi sab kahan hain?" Hashim ne Shehrin se taaruf karwa kar hairat se Saadi ko dekh kar poocha.

"Sam ko bukhaar tha to ammi uske paas ruk gayin. Bade abba ki family ko kahin aur jaana tha aur Faris maamu..." Kehte hue Saadi ne lawn ke dakhli check point ko dekha. "Wo dawat ke shuru mein the, magar phir evening class ke liye chale gaye."

(Jabke Faris ne sirf sar-sari taur par poocha tha, "Tumhare dada ki family nahi aayi?" Saadi ne bataya "Nahi." To wo bas das minute ruka aur phir uth gaya. Waris bhi zyada dair nahi baithna chahta tha, magar Saadi aur Haneen ki wajah se wo pa-band ho kar reh gaya tha.)

"Us din ke liye dobara shukriya," Hashim ne phir se Saadi ka kandha thap thapaya to wo sharminda ho gaya aur baat badalne ke liye maamu se poochha,

"Main us din jo Saara khala ke baare mein bata raha tha, wo unki wife hain."

"Main jaanta hoon," Hashim ne muskara kar sar hila diya.

Shehrin palat kar kisi aur se baatein karne mein mashgool ho gayi thi.

"Aur Waris! Kya kar rahe ho?"

Jebo Mein Haath Daale Khade Waris Ne Zara Se Kandhe Uchkaaye.

"Kuch gade murde ukhaadne ki koshish kar raha hoon."

Hashim ne muskurate hue gehri nazron se use dekha. "Meri madad ki zaroorat ho to batana."

"Hmm... zaroor bataunga."

Hashim muskara kar jaane ko mudha, phir Hannah ko dekh kar ruka.

"Maine itna shaky camera work aaj tak nahi dekha." Uski tareef kar ke wo palat gaya to Haneen ne shaane jhatke.

"Pata nahi, pehli dafa mein koi mera yaqeen kyun nahi karta?"

"Kya shandaar bande hain ye Hashim bhai!" Wapas baithte hue Saadi ne bohot fakhar se kaha to Waris ne chonk kar use dekha.

"Tumhein maaloom bhi hai ke ye kaun hai?"

"Ji, ye bohot acche vakeel hain."

"Bohot acche difa'i vakeel hain, wo bhi criminals ke. Aur criminal ke difa'i shakhs ko main criminal se alag nahi samajhta."

"Mamu!" Saadi bohot sanjeedgi se uski taraf mudha. "Ho sakta hai aap inko pasand na karte hon aur shayad inki izzat bhi na karte hon. Aur ho sakta hai inki company corruption mein bhi mulawwis ho. Magar is sab ke bawajood hum inko criminal nahi keh sakte. Main inko jaanta hoon. Wo bohot acche hain."

Waris chup ho gaya. Agar Saadi ko pata chal jaye ke wo Hashim ko itna nahi jaanta to?

Mery muskurate hue aayi aur Saadi ke kaan ke qareeb jhuki.

"Mrs. Kardar aapka intezar kar rahi hain."

Wo chonka. Phir sab se maazrat karta uth aaya.

Bahar neeli shaam mein siyahi ghalne lagi thi, magar andar roshniyon ka sooraj joban tha. Phool hi phool, roshni hi roshni. Lounge mein ruk kar Saadi ne lehrate diye uthaye.

Seedhiyo se upar, Hashim ke kamre ke samne railing par kohni tikaye, doosre haath mein necklace ka moti ghumati, wo kisi malika ki tarah khadi thi. Surkh lamba gown, surkh lipstick, aur aankhon mein gehra kajal... aur gehra iztirab.

Saadi qadam qadam chadhta upar aaya. Bilkul jawaharat ke muqabil.

"Aapka chhota beta kaisa hai?" Saadi ne khankhaar kar baat ka aghaz kiya. Jawahirat muztarib se muskurane ki koshish ki, magar aankhon mein nami aa gayi.

"Wo tayyar hai. Kamre mein hai. Bhai ke liye dawat mein shamil ho bhi jayega, magar khush nahi hoga." Muskurate hue sar jhatakte, zabt se aankhe gulabi hoti gayi.

Saadi ne putliyan skeitkar gaur se uska chehra dekha.

"Yani... Kardar sahab ko ilm ho gaya?"

Jawahirat ne isbaat mein gardan hilaayi.

"Har pareshaani mein ek hi khayal hota hai... Hashim sambhal lega. Magar aaj Hashim ka bada din Kharab nahi kar sakti. Warna sambhal to wo ab bhi leta..."

Usne narmi se Saadi ki kohni pe haath rakha.

"Kya tum kuch kar sakte ho?"

Saadi ne gardan mod kar Sheru ke kamre ko dekha.

"Mujhe koshish karne de." Usne darwaze par dastak di.** Jawahirat ek taraf hat gayi. Saadi ne darwaza dhakela.

Bed ke kinare wo sar jhukaye baitha tha. Suit, joote, tie, sab tayar tha, magar khud bujha bujha sa. Saadi ko dekh kar wo pheeka sa muskuraya.

"Main Saadi... Faris ka—"

"I know bhai ne bataya tha. Aao."

Saadi chand qadam andar aaya. Darwaza wapas dhakela to wo chokhat se teen inch ke faasle pe ja thahra. Bahar khadi Jawahirat ki muztarib sama'atein wahi lagi thi.

"Kaisi tabiyat hai tumhari?" Wo samne khade khade ihtiyaat se poochhne laga. Sheru ne sar jhatka.

"Bataya tha maine ke tumne mujhe bachane ki koshish ki thi, thanks. Magar Kardar sahab ko ilm ho gaya."

"Maine tumhe bachane ke liye kuch nahi kiya. Wo fikrmand the. Maine unko mazeed pareshaan nahi karna chaha tha."Jawahirat ne chonk kar darwaze ko dekha. Sheru bhi chonka tha.

"Wo mere liye kabhi pareshaan nahi ho sakte." Phir ruka. "Kya wo waaqi pareshaan the?"

"Bohot zyada. Is liye tumhe neeche ja kar unko unke bete ki shaadi ki mubarakbaad deni chahiye."

Nosherwan ke maathae par bal pade. Aankhon mein khataa dar aayi. "Kya tumhe lagta hai wo mujhe maaf kar denge?" Awaaz buland hone lagi. "Main Harvard nahi ja saka. Colombia nahi ja saka. Main unke office mein dilchaspi bhi nahi rakhta. Main drugs lene lag gaya tha aur us roz drugs ki wajah se maine khud ko hospital pahuncha diya. Unko itna mayoos kiya khud se... Is sab ke baad wo mujhe kya samajhte honge?"

"Sirf apna beta."

Wo jo gusse se bole ja raha tha, jhatka kha kar ruka. Tane ta'assur dheele pad gaye. Yaktak Saadi ko dekhta raha.

"Aur maafi, shukriya, aur izhaar-e-mohabbat... In teen cheezon ki khoon ke rishto mein kabhi zaroorat nahi hoti. Sirf rawaiya durust karna hota hai... Aur sab theek ho jata hai."

"Aur... aur agar unhone mujhe daant diya?" Wo andar se dara hua tha.

"Main tumhe ek kahani sunata hoon, Nosherwan!" Saadi ne sir jhukaye joote se lakdi ka farsh maslate kehna shuru kiya.

"Main ek ladke ko jaanta hoon jiska baap school teacher tha. Tankhwa kam thi aur guzara mushkil se hota. Magar wo ladka kabhi bhi apne baap ke samne khwahishat ki fehrist nahi rakhta tha. School le jaane ko paise bhi nahi maangta tha. Magar jab wo 13 saal ka tha to school function ke liye use naye jooto ki zaroorat padi. Balki zaroorat nahi, sirf khwahish thi. Kyunki uske doston ne naye jooto ki numaish ki thi, wo jin mein rang-birangi linein lagi hoti hain."

"Us roz usne apne baap se kaha ke use bhi wahi joote chahiye. Baap kuch der ko chup hua to wo samjha ke baap nahi le kar dega. Wo baap se naaraz ho gaya. Usne baap se baat karna bhi tark kar diya."

"Raat uske sirhaane uska baap aaya aur kaha ke wo use kal joote la dega. Bilkul wahi joote. Magar wo ladka naaraz raha aur aankhein band karke sota ban gaya."

"Subah uska baap school ke liye jaldi chhutti le kar jooto ki us mehngi dukaan pe gaya. Jaane kahaan se paise jod kar usne wo joote kharide"

"Aur jab wo sadak aboor kar raha tha to aik bus ne usay takkar maar di." Lamhe bhar ke liye neeche dekhte Saadi khamosh ho gaya.

"Jab log uske baap ki laash ko ghar laaye to saath khoon mein nahaay huay jooton ka dibba bhi tha. "Joote aa gaye, Nosherwan! Baap chala gaya."

"Agar tum is ladke ko keh do ke is shart pe uski zindagi paanch minute baad le li jaaye aur uska baap uske samne aayega aur in paanch minute mein sirf usko naye aur wo saari daant sun kar sirf maafi maang sake to us ladke ko wo paanch minute ki zindagi bhi qubool ho gi. Kyunki apni zindagi ke agle paanch saal mein usne ye baat achi tarah jaan li thi ke baap ka koi "replacement" nahi hota."

Nosherwan ki rangat zard pad chuki thi. Wo aik dum uthha aur bahar nikal gaya. Jawahirat peeche hui, magar usay dekhe bina wo tez qadamo se seediya utarna shuru kar gaya. Neeche lounge mein aurangzeb khade kisi mulazim ko hidayat de rahe the. Nosherwan unke qareeb ruka jichka phir unko kuch kehte hue unke galay laga. Shayad wo Hashim ki shaadi ki mubarakbaad de raha tha.

Aurangzeb ne sun kar usay khud se alag kiya. Khafgi se kuch kehte hue coat ka baazu jhaara jese shikan parh gayi ho. Magar ab unke chehre pe sakhti na thi aur Sherwan ka chehra damak raha tha. Jawahirat ne aankho ki nami andar taari aur phir palat kar kamre mein aayi.

Saadi yunhi sir jhukaaye khada tha. Ahat pe sate hue chehre ke saath halka sa muskuraya.

"Thanks!" Wo kuch bol nahi paa rahi thi. Uske samne ja khadi hui.

"Kya waaqi... Aurangzeb us din Shero ke liye pareshan hua tha?"

"Aur kaise pareshan hua jata hai?" Usay tajjub hua." Jawahirat ne muskurakar sir hilaaya.

"Shayad main bhi Sheru ki tarah kabhi kabhi usko samajh nahi paati. Wo aik sakht geer baap hai, magar usay sirf Hashim sambhal sakta hai. Khair kabhi kabhi aa jaya karo tumse baat kar ke achaa lagta hai."

"Main Leeds chala jaaunga jald. Mujhe scholarship mil gaya hai. Chemical Engineering."

"Sheru bhi engineering padega."

"Magar wo to Manchester jaayega, Hashim bhai ne bataya tha."

Jawahirat ne aik nazar Saadi par dali phir aik nazar sheru ke kamre pe.

"Nahi, usne abhi faisla nahi kiya."

"Acha?" Saadi ko hairat hui. Hashim bhai to bilkul sure the.

"Kya tum mujhe apni family se nahi milao ge?" Wo muskurakar apne aap ko compose karti uske saath bahar aayi. Saadi ne bhi muskurakar sir hilaaya.

Wo dono humrah chalte jab seediyo ke wast mein the to Jawaharat ne ruk kar usay dekha.

"Agar us ladke ke walid aaj zinda hotay to is par bohot fakhr karte."

Saadi ne jawab nahi diya. Bas udaasi se muskurakar zine utar ne laga.

☆☆☆

Shaam maghrib mein dhal chuki thi aur Faris library ke kone wali mez par betha bore sa ho kar baar baar ghari dekh raha tha. Samne notes aur rataan mein bhi muntazir si padhi thi. Dafatan wo aati dikhayi dee. Kando pe bag, haathon mein kutta, baal joday mein banday. Thakay thakay andaaz mein kursi kheenchti. Bag rakha. Faris foran seedha ho kar baitha.

"Mujhe namaz mein der ho gayi. " Usko dekhe bina woh baith kar kitaab khol rahi thi. Faris ne sar ko khum diya phir laga koi aur bhi saamne khada hai. Chonk kar chehra uthaya to saath wali kisi khinch kar Jamshed Afzal baith raha tha. Is se pehle ke Faris na gawari se usse rokta, "ke Bhai tum kidhar?" Zumar ne kaha.

"Jamshed ko bhi yehi na samjhna tha. Baitho Jamshed. Ye aaj hum cover kar lenge." Kitaab ke safhe palat-te ishara karti woh bahut masroof lag rahi thi. Thaki hui bhi.

Ainak lagane wala woh dubla patla sa student tabadari se saamne baitha. Faris ne tund nigaahon se usse ghura aur zabt se rukh pher liya. Woh shiddat se badmaza hua tha. Usay khud bhi maloom nahi tha ke kyun?.

Zumar apne ball pen haath mein pakde baari baari dono ko dekhti samjha rahi thi. Jamshed jaldi jaldi register par notes lene mein magan tha aur Faris gahe bagahe ek ukhri ukhri ki nazar us par daal leta.

"Hunh, ye banenge wakeel. Judge ne ek phoonk maarni hai aur isne urh jaata hai."

Das minute baad woh ladka uske liye na qabil-e-bardaasht ho gaya tha. Woh kuch pooch raha tha aur Zumar dobaara usse wohi baat samjha rahi thi. Faris ki bezari badhne lagi. Tabhi Zumar ka phone baja. Call zaroori thi, woh maazrat karti uth kar baahar chali gayi.

Usne ab bohot fursat se putliyan sikud kar us chashmish ko dekha. Phir uske samne ungli se mez bhai. Register par likhte ladke ne chonk kar usay dekha.

"Woh kitaab pakarana" tahakkam se mez ke doosre sare par rakhi kitaab ki taraf ishara kiya. Woh tabadari se sar hilata jaise hi utha Faris ne uski kitaabo ke saath rakha uska mobile uchak kar apni jeb mein rakha. Ladka wapas aaya kitaab saamne rakhi aur register phir se khol liya. Faris ne hathali uske saamne ki.

"Zara phone dena apna. Mera credit nahi hai. Ek call karni hai."

Ladke ne muskarakar apni kitaab banayi, phir register hataaya phir notes ek taraf kiye. Muskaraahat ghaib hui. Woh pareshan sa cheeze ulat palt karne laga. Phir jeb thapthapaye.

"Nahi dena hai to na do." Woh bigde mood se bola.

"Nahi abhi to mere paas tha. Aap bell denge zara?"

"Lo, mera credit hota to tumse kyun maangta?" Usne naak se makkhi udaayi. "Waise aakhri dafa kahaan istemaal kiya tha phone?"

"Woh haan, Doctor Abdul Bari ke office ke saamne."

"Woh to do blocks door hai. Raaste mein gira hoga. Ab tak to koi le uda hoga. Yun karo, wapas jao aur raaste ka ek ek patthar utha kar dekho. Shabash." Saath hi uska shaana thapthapaya. Woh single pasli hil kar reh gaya. Phir jaldi jaldi cheezen samet'ta wahan se bhaag gaya.

Zumar jab aayi to chewing gum chabata Faris akela wahan baitha tha. Usne taajub se khaali kursi ko dekha.

"Yeh kahan gaya?"

"Pata nahi. Kuch kho baitha tha itni jaldi mein bhaga ke mobile bhi chhod gaya." Laprawahi se mez par rakhe mobile ki taraf ishara kiya jise woh off kar chuka tha." Zumar na-gawari se sar jhatakte waapas baithi.

"Yeh non-serious students bhi na."

"Nahi! Aap israr karti hain to uska intezaar kar lete hain. Aadha pon ghanta hi lagega usay." Bohat hi khair khwahi se poocha. "Koi zarurat nahi hai," woh darushti se kehti kitaab kholne lagi. Woh sar hila kar bohat enhamaq se usay sunne laga. Ab woh bohat behtar mehsoos kar raha tha.

☆☆☆

Us unche aur nafees lounge mein na phool the na us din ki raunak. Ek kinare par qadawar khidki ke saath do kursiyan saath saath rakhi thi. Unke beech chhoti mez rakhi thi. Ek kursi pe Jawahirat tang pehna tak jamaye baithi thi, gardan zara tirchi kiye baaye haath pe baithi Saadi na muskara kar sun rahi thi, jo aage ko jhuk kar baitha apne haathon ko dekh raha tha aur keh raha tha:

"Phir abu ke accident ke baad ammi ne teaching shuru kar di. Ab to woh retire hone wali hain. Sehat bohat achhi nahi hai unki." Woh kaafi der se bolta ab khaamosh ho gaya.

Jawahirat ne muskara kar abroo uchakay. "Achha laga tumhein sun kar. Is se bhi zyada achha yeh ke tum meri ek call pe chaley aaye. Aate jaate raha karo."

"Ab agle saal chhuttiyo pe hi aaoonga. Haan koshish karunga ke kabhi Sheru se Manchester mein mulaqat ho jaye."

"Kya maine tumhein nahi bataya ke woh bhi tumhari hi University Mein ja raha hai " saadi ne Chauk kar use Dekha wo bil-khusoos Muskura rahi thi,

" Magar," Wo chup ho gaya. "Main jis saadi yousuf ko janti hun wo kafi saafgo hai to tum bata kyon nahin dete ki tumhen kya bura laga hai?" "I'm sorry, magar aapne use apna faisla badalne per kyun majbur kiya hai?" "Maine sirf Khwahish ki aur wo man Gaya." "Magar kyun?" "Tum durust soch rahe ho main chahti hun Ki tum mere bete ke sath raho." Saadi ne ulajhkar usay dekha. "Mrs. Kardar Agar ap chahti hai ki main uska khyal rakhun to main babysitter Nahin hoon, agar aap chahti hain ki main usko har waqt nasihat karta rahun to, main muballig bhi nahin hoon, aur agar aap ye chahti hai ki main uske pal pal ki khabar aapko du to Main jasus Bhi Nahin hoon." "Main yahi sab chahti hun magar babysitter, muballig ya jasus ki haisiyat se nahin, ek dost bankar!" "Hamari pehle hi acchi Dosti ho chuki hai aur dost bankar main ye sab kar sakta hun Magar Jitna main aapke bete ko samjha hoon." usne nafi Mein Gardan hilai. "Agar usey ye ilm Hua ki aapne meri Wajah se to, um hmm! woh bahut Khafa hoga." "Saadi mera beta drugs per tha baap se Nala Tha Ab wo Vada kar chuka hai Khud Ko badalne Ka Magar kya mujhe uska yakeen kar lena chahie ya uski fikr Karni chahie Mujhe uski sehat ki fikar uski University Se zyada Hai mujhe laga main tum per Bharosa kar sakti hun kya tum mere acche dost nahin Ho?" Saadi ne gehri Saans Lekar asbat Mein Sar hilaya. "Okay magar main uski pusht kabhi bhi Kuchh Aisa nahin Karunga Jis per Wo Mujhse Khafa ho, Khair aap batae Hashim bhai kaise hain unke honeymoon per jaane ke bad aap to unko bahut miss kar rahi hongi.." Jawahirat Ne shane uchkae. "Uske gair maujudgi mein to ye ghar kat khane ko daurta hai." "Wo apni biwi ke sath wapis aaenge to phir ronak ho jayegi." "Mohabbat andhi hoti hai magar ummid hai shaadi aankhen khol degi use jald ilm ho jaega ki use ladki se uske status ki wajah se usse shaadi ki hai." Saadi ko is baat ki ummid nahin thi. "Agar aisa tha to aapne unko roka Kyun Nahin?" "Main rokti to wo na karta zyada behtar hai ki wo tajurba karke sikhe." Phir Hath uthakar Panch ungaliyan use dikhayi. "5 Saal bhi nahi chalegi uski ye shaadi tum ye Baat Kisi diary mein likhkar rakh lena." "Achcha Mujhe to wo acchi lag rahi thi unke sath." Wo Soch Mein Par Gaya. "Woh isliye ke Kyunke tum acche ho aur tumhen wo acchi lag rahi thi, Tumhe ek baat Kahun?" Chunke wo uske bayee taraf baitha tha to wo Tirchi hokar uski Taraf muri. "Shadi ka matlab hota hai Khush-Kismat Aur bahut acche log kabhi bhi khush-kismat nahin Hote!"

"Yah munhaseer hai ke aap khushkismati Kise Kehti Hain Gham ka Milna badkismati nahin hai aur Khushi Ka Milana khushkismati nahin hai, aur alag baat hai ki aap Khushkismati ko Kis Tarah Dekhti Hai" Jawahirat glass Utha Kar Ghut Ghut Peene Lagi. Wo jab upar sheru ke kamre mein aaya to wo computer ke sath baitha koi game khel raha tha. "Aao baitho" usne screen per apni markoj kiye apni piche se cushion nikal kar saadi ki taraf Uchala saadi ne cushion wahi Rakha aur uske sath hi baith Gaya. "Tumhari mummy ne bataya Ki Tum Bhi leeds ja rahe ho? " "Han unhone bataya tha ki Tumhara bhi wahin dakhila hua hai" wo bohot inhemak se game ki taraf mutwajja tha ek dam Bura Sa Munh Bana kar Kuchh key zor se dabae aur phir "oh! no!" keh kar mez per Mukka mara game over. "Tum abhi iske 40th round par ho?" Saadi mein tajjub se screen Ko Dekha. "Meri Behan to 110th kar chuki hai " Sheru ne be yakeeni Se Uski Taraf Muda.

"main maan hi Nahin Sakta 100 se upar Puri Duniya Mein Sirf teen log hain aur Unka Naam high score ki fehrist mein hai. main Tumhen dikhata hoon." usey Jaise saadi ki is bhadak ko jald se jald galat sabit karna tha Kuchh Shafe kholta Gaya Yahan Tak ke Ek fehrist Samne ayi saadi Khamoshi se use dekhta Raha. "Yeh dekho is game mein aaj tak sirf yahi log---" Nosherwan bolte bolte hakla Gaya list ka dusra Naam jagmagate Hue Uske Samne tha Haneen Yousuf! "Ye Meri Behan Hai." Saadi Ne Bina Kuchh jatae Ishara Kiya Nosherwa ne bilkul fati fati nigaho se us 10 afrad ki list ko dekh raha tha baki bahut se logo ne apne naamon ki jagah nicknames bhi rakhe hue the agar Haneen ka koi aur Nickname hota to wo saadi ko jhutha karar de deta magar khair first per to wo bhi nahi Hai sheru ne bazahe laparwahi se naak se makkhi udai saadi ki najre sabse upar wale naam tak thehri usne jara aage hokar parha wo nickname tha 'ants ever after!' "Yeh Kaun Hai." Haneen ne ye list bahut bar Dikhai Thi Fir Bhi usne note Shayad ab kiya tha, Sheru Ne us markuza shakhs ki profile per click Kiya. "Koi american ladki hai isse zyada maloomat nahin open kar rakhi. Kya tum mere sath khelna chahoge?" Wo nayi game Shuru Karne Laga tha. "Nahi" saadi Bore Sa hokar Piche hua. "Main ek baat acchi tarah jaanta hun nosherwan ki main koi bhi game nahi jeet sakta mere pass phupho, Haneen ya Hashim bhai jaisa dimag nahin hai."

ㅤ

ㅤ ㅤ ㅤ

≿━━━━༺❀༻━━━━≾